Me një rezultat të mrekullueshëm, Firat Arslan, e mbrojti shiritin e vet të Kampionit Botëror në kategorinë Cruser.

Të shikosh shokun e Luan Krasniqit në ring, ishte një përjetim i veçantë, mbase gjatë 12 roundave, kundërshtarin e tij, amerikanin Darnell Wilson, e mbajti në ankth. Vlerësimi i njëzëshëm dhe bindës që rezultoi me pikët 117:111, ishte dëshmi më e mirë e angazhimit të boksierit Arslan.

Wilson, i cili është i njohur si boksier KO, asnjëherë nuk e kishte ndonjë rast kundër Firatit, i cili edhe kësaj here e dëshmoi përgatitjen e tij fizike dhe psiqike. Në vazhdimësi Firat Arslan e ngujonte kundërshtarin nga Amerika dhe nuk e lejoi për asnjë çast ta mbledh vehten.

Kështu, edhe Luan Krasniqi, relativisht i qetë pati rastin ta ndjek duelin për të cilin tha: “Që nga raundi i shtatë, isha i sigurt se Firati do ta ngadhnjej kundërshtarin”. Boksierit nga Rottweili, fytyra i ngazllente nga gëzimi për fitoren e shokut të tij.

Se çfarë do të ndodh me te mëtej, aktualisht akoma nuk dihet, por është e sigurtë se Krasniqi sërish do të kthehet në ring dhe me padurim pret që në ring t`iu prezentohet aderuesëve të tij.

Deri në rastin që do të pasoj, Krasniqi i gëzohet mbrojtjes së suksesshme të titullit nga shoku i tij dhe se edhe ne i dërgojmë urimet më të mira për fitoren Firat Arslanit.